di Anna Rita Cardia
Unu contu de annus fait, una curriera de is Ferrovias Meridionalis Sardas (FMS) partìat d-ònnia menjanu de sa bidda de Musei, brintàt e si firmàt a Domusnoas e arribàt a Igrèsias faci a is otu e dexi. Is passegeris fìant prus de totu piciocheddus chi andànt a studiai me is scolas mannas de Igrèsias. De unu pagheddu de tempus, in d-una firmada de Domusnoas, artziàt in custa curriera una fèmina antziana, tzia Juannica, chi andàt a Igrèsias po fai una cura po is genugus. S’autista fìat sempri su pròpiu e, cun meda donosidadi (=gentilezza), ajudàt cussa fèmina a nci artziai e a ndi calai de sa curriera. Tzia Juannica si est afetzionada meda a cussu autista e iat cumentzau a ddi portai sachiteddus de nuxedda, chi issu agradessìat meda.
Una dì, s’autista, guidendi e matziendi nuxedda, aici cumenti fadìat de unu bellu pagheddu de tempus, at pregontau a tzia Juannica innui comporàt cussa nuxedda aici saborìa, ca issu aici bona no ndi iat agatau mai in nisciunu logu.
Cussa fèmina, bona e notzenti,ddi at arrespustu aici: «Fillu miu, custa nuxedda deu no dda comporu in nisciunu logu; deu comporu is ciculateddus “Ferrero Rocher”, poita mi praxint meda, ma, cumenti tui podis biri, seu totu scasciabada; mi papu su ciculati e mi sùciu beni beni sa nuxedda; a pustis, mi-ndi-dda bogu de buca e dda allogu po tui, poita apu biu ca portas, biau, una bella carrera de dentis!».
S’autista, a cussu puntu, at fatu una bella frenada e at firmau sa curriera in d-una pratzola de sa Bia Statali 130, jai a s’intrada de Igrèsias. Ndi est calau a sa lestra e at cumentzau a caciai; at sighìu a su mancu po mes’ora; parìat ca ndi-ddi bessìat de buca fintzas sa frisciura! Scedau! Gei dd’est passau sa gana de si papai sa nuxedda de tzia Juannica!
Sa dì, sa curriera est arribada a Igrèsias a su mancu cun mes’ora de ritardu e cun mes’ora bona de ritardu funt intraus a scola is piciocheddus chi fìant in cussa curriera. In mesu de cussus nci fiat puru Nicolinu, unu alunnu miu de Musei, chi frecuentàt sa 4° crassi de su Liceu Linguisticu. Candu issu est brintau in s’àula, anca deu femu sprichendi (= spiegando) Latinu, at justificau su ritardu, narendi beni beni custu contu. Deu no sciu chi apat contau fàulas o chi apat nau sa beridadi; comuncas, deu su ritardu a Nicolinu si dd’apu justificau e sa letzioni de Latinu dd’apu fata beni beni a s’incràs. No nci fiat pressi!
